काठमाण्डौ, २ पुस । चीनमा आगामी बर्ष हुने एसियन महिला भलिबल च्याम्पियनसिपमा नेपाल सहभागी हुने भएको छ । नेपाल भलिबल संघले चीनमा अर्को वर्ष हुने एसियन महिला च्याम्पियनसिपमा सहभागिता जनाउने निर्णय गरेको हो ।
संघको कार्यसमितीको बैठकले सन् २०२१ मा चीनको गोन्जाओमा हुने एसियन महिला भलिबल च्याम्पियनसिपका लागि नेपाली महिला टिमलाई सहभागी गराउने बताएको छ ।
चिनीयाँ भलिबल संघको आयोजनामा हुने प्रतियोगिता अगष्ट २९ देखि सेप्टेम्बर ५ तारिखसम्म हुनेछ ।
यो प्रतियोगितामा सहभागिता जनाउनका लागि जनवरी १५ तारिखसम्म टिम दर्ता गर्नुपर्ने समय तोकिएको छ ।
प्रतियोगितामा सहभागी हुने नेपालको निर्णयलाई एसियन भलिबल महासंघले स्वीकृति दिएमा प्रतियोगितामा खेल्न पाइनेछ ।
प्रतियोगितामा १६ भन्दा बढी टिमले दावेदारी गरेमा नतिजाका आधारमा टिमको छनोट हुनेछ ।
